ਸਲੋਹ/ਯੂ. ਕੇ. । ਬਿੱਟੂ ਖੰਗੂੜਾ
ਵਿਰਸਾ ਇੱਕ ਵਗਦਾ ਦਰਿਆ, ਜੋ ਭੂਗੋਲਿਕ, ਰਾਜਨੀਤਕ ਅਤੇ ਸਮਾਜਿਕ ਪ੍ਰਸਥਿਤੀਆ ਅਨੁਸਾਰ ਹਰ ਸਮੇਂ ਕੌਮ ਦੀਆ ਵਿਰਾਸਤਾ ਘੜਦਾ ਵਹਿੰਦਾ ਰਹਿੰਦਾ ਹੈ। ਤਬਦੀਲੀ ਕੁਦਰਤ ਦਾ ਨਿਯਮ ਹੈ, ਨਵੀਆਂ ਹੋਣੀਆ ਸੰਗ ਕਦਮ ਮਿਲਾਕੇ ਚੱਲਣ ਵਾਲੀਆ ਕੌਮਾ ਹੀ ਤਰੱਕੀ ਕਰਦੀਆਂ ਹਨ, ਪਰ ਆਪਣੀ ਵਿਰਾਸਤ ਨੂੰ ਭੁੱਲਣ ਵਾਲੀਆ ਕੌਮਾਂ ਇਕ ਦਿਨ ਆਪਣੀ ਹੋਂਦ ਗਵਾ ਲੈਂਦੀਆ| ਪ੍ਰਦੇਸਾ ਵਿਚ ਵਸਦੇ ਪੰਜਾਬੀ ਹਮੇਸ਼ਾ ਆਪਣੇ ਬੱਚਿਆ ਦੇ ਵਿਦੇਸ਼ੀ ਮਾਹੌਲ ਦੀ ਭੀੜ ਵਿਚ ਗੁਆਚਕੇ ਆਪਣੇ ਅਸਲੇ ਨਾਲੋ ਨਿਖੜ ਜਾਣ ਦੇ ਖਦਸ਼ੇ ਵਿਚ ਚਿੰਤਾਤੁਰ ਰਹਿੰਦੇ ਹਨ| ਪਰਵਾਸੀ ਪੰਜਾਬੀਆ ਵਲੋ ਸਮੇਂ-ਸਮੇਂ ਤੇ ਆਪਣੀ ਵਿਰਾਸਤ ਨੂੰ ਅਗਲੀ ਪੀੜੀ ਤਕ ਪਹੁੰਚਾਉਣ ਲਈ ਕੁਝ ਸੁਹਿਰਦ ਯਤਨ ਹੁੰਦੇ ਰਹਿੰਦੇ ਹਨ।
ਅਜਿਹਾ ਹੀ ਇਕ ਉਪਰਾਲਾ ਅਪਨਾ ਵਿਰਸਾ ਵਲੋ ਯੂ. ਕੇ. ਵਿਚ ਸਲੋਹ ਵਿਖੇ ਫਾਲਕਨ ਸਪੋਰਟਸ ਸੈਂਟਰ ਵਿਚ 12 ਅਪ੍ਰੈਲ ਨੂੰ ਵਿਸਾਖੀ ਦੇ ਸਬੰਧ ਵਿਚ ਇਕ ਮੇਲਾ ਤੀਜ ਤਿਓਹਾਰ ਲਗਾ ਕੇ ਕੀਤਾ ਗਿਆ। ਸਲੋਹ ਦੀ ਮੇਅਰ ਸਮੇਤ ਲਗਭਗ 500 ਦਰਸ਼ਕਾਂ ਦੀ ਸ਼ਮੂਲੀਅਤ ਵਾਲੇ ਨੈਸ਼ਨਲ ਲਾਟਰੀ ਦੇ ਹੈਰੀਟੇਜ ਲੌਟਰੀ ਫੰਡ ਦੇ ਸਹਿਯੋਗ ਨਾਲ ਲਗਾਏ ਇਸ ਮੇਲੇ ਵਿਚ ਗਿੱਧਾ, ਭੰਗੜਾ, ਗੀਤ-ਸੰਗੀਤ ਅਤੇ ਖਾਲਸੇ ਦੀ ਰਵਾਇਤੀ ਸ਼ਸਤਰ ਵਿਦਿਆ ਦੀ ਪ੍ਰਦਰਸ਼ਨੀ ਕੀਤੀ ਗਈ।
ਸਭ ਮੇਲੀਆ ਦਾ ਪਹਿਲਾਂ ਜਲੇਬੀਆ ਅਤੇ ਚਾਹ ਨਾਲ ਸਵਾਗਤ ਕੀਤਾ ਗਿਆ । ਪ੍ਰੋਗਰਾਮ ਦੀ ਸ਼ੁਰੂਆਤ ਵਿਚ ਅਪਨਾ ਵਿਰਸਾ ਦੀਆਂ ਕੋਆਰਡੀਨੇਟਰ ਬਾਬੀ ਅਤੇ ਸੀਮਾ ਨੇ ਅੰਗਰੇਜ਼ੀ ਅਤੇ ਪੰਜਾਬੀ ਵਿਚ ਵਿਸਾਖੀ ਦੀ ਵਿਰਾਸਤੀ ਮਹੱਤਤਾ ਬਾਰੇ ਜਾਣਕਾਰੀ ਦਿੱਤੀ। ਉਪਰੰਤ ਦੋ ਘੰਟੇ ਤਕ ਚੱਲੇ ਇਸ ਰੰਗਾਰੰਗ ਸਮਾਰੋਹ ਨੇ ਦਰਸ਼ਕਾ ਨੂੰ ਬੰਨੀ ਰੱਖਿਆ। ਸਮਾਪਤੀ ਤੇ ਲੰਗਰ ਦਾ ਵੀ ਪ੍ਰਬੰਧ ਸੀ ।
Leave a Reply