Punjabi Poetry ਕਿਹੜੀ ਆਜ਼ਾਦੀ ਚਰਨਜੀਤ ਸਿੰਘ ਤੇਜਾ

Editor

Publish Date:

Jan 26, 2009 7:21 AM

Updated Date:

Aug 9, 2024 5:35 AM

ਅੱਖਰ ਵੱਡੇ ਕਰੋ–+=

Punjabi Poetry about Freedom | Kehadi Azadi by Charanjit Singh Teja | ਕਿਹੜੀ ਆਜ਼ਾਦੀ? – ਚਰਨਜੀਤ ਸਿੰਘ ਤੇਜਾ

ਮਨੁੱਖੀ ਚੇਤਨਾ ਦੀ ਸਭ ਤੋਂ ਖੁਸ਼ਹਾਲ ਅਵਸਥਾ
ਹਰ ਜਾਗਦੀ ਅੱਖ ਦਾ ਸੁਪਨਾ
ਕਤਰਿਆਂ ਪਰਾਂ ਦੀ ਤਾਂਘ
ਪਿੰਜਰੇ ‘ਚ ਪਿਆਂ ਦੀ ਅੱਥਰੀ ਉਡਾਣ
ਆਜ਼ਾਦੀ………..?

ਕਿਸੇ ਵਾਦੀ ‘ਚ ਗੂੰਜਦਾ ਗੀਤ
ਝੀਲ ‘ਚ ਖਰਮਸਤੀਆਂ ਕਰਦਾ ਸ਼ਿਕਾਰਾ
ਸੁੰਮਾਂ ਵਾਲੇ ਬੂਟਾਂ ਹੇਠਾਂ ਪਲਦਾ ਬਚਪਨ
ਮਾਵਾਂ ਤੇ ਭੈਣਾਂ ਦੀ ਪੱਤ
ਮਾਰ ਸਹਿੰਦੇ ਬੁੱਢੇ ਅੱਬਾ ਦੇ ਹੱਡ
ਤਾਰੋਂ ਪਾਰ ਜਾਣ ਦਾ ਵਿਚਾਰ
ਆਜ਼ਾਦੀ………..?

ਹਰੀਆਂ ਕਚੂਰ ਪਹਾੜੀਆਂ ‘ਚ ਸ਼ਾਂਤ ਵਹਿੰਦਾ ਜੀਵਨ
ਸਦੀਆਂ ਤੋਂ ਹੱਸਦੇ ਵੱਸਦੀਆਂ ਸੱਤੇ ਭੈਣਾਂ
ਨਕਸ਼ੇ ਦੀਆਂ ਹਾਬੜੀਆਂ ਲੀਕਾਂ
ਝੰਡੇ ਦਾ ਫ਼ੈਲਦਾ ਆਕਾਰ
ਮਾਂ ਬੋਲੀ ਤੇ ਸੱਭਿਅਤਾ ਦਾ ਘਾਣ
ਰੁਜ਼ਗਾਰ ਮੰਗਦੀ ਤੇ ਕੁੱਟ ਖਾਂਦੀ ਜਵਾਨੀ
ਆਜ਼ਾਦੀ………..?

ਅਮੀਰਾਂ ਦੇ ਦੇਸ ‘ਚ ਢਿੱਡ ਬੰਨ੍ਹ ਸੌਂਦੀ ਜਨਤਾ
ਲਚਾਰੀ ਤੇ ਬੇਬਸੀ ਸਾਹਮਣੇ ਮੂੰਹ ਮੋੜੀ ਬੈਠਾ ਰੱਬ
ਪਲ-ਪਲ ਥਾਵੇਂ ਇਕ ਫੱਟ ਮੌਤ ਦੀ ਚੋਣ
ਹਰ ਢਿੱਡ ਦੀ ਜੰਗ, ਲਾਲ ਸਲਾਮ
ਤਿਹਾਈ ਧਰਤ ਨੂੰ ਸਿੰਜਦਾ ਖ਼ੂਨ
ਹੱਕ ਮੰਗਣ ਦਾ ਸਹੀ ਤੇ ਸੁਖ਼ਾਲਾ ਰਾਹ
ਆਜ਼ਾਦੀ………..?

ਮੱਥੇ ਅੱਤਵਾਦੀ ਦੀ ਮੋਹਰ ਲਾ ਜੰਮਦੇ ਮਸੂਮ
ਜੰਮਣ ਤੋਂ ਮਰਨ ਤਕ ਦੇਸ਼ ਧਰੋਹੀ
ਇੱਜ਼ਤ ਤੇ ਮਾਣ ਲਈ ਜਹਾਦ
ਦੰਗਿਆਂ ਤੇ ਧਮਾਕਿਆਂ ਦੀ ਸਿਆਸਤ
ਬੁਸ਼ ਤੇ ਲਾਦੇਨ ਦੇ ਝਗੜੇ ‘ਚ ਕੁਟੀਦੇ ਹਨੀਫ਼ ਤੇ ਕਸਾਬ
ਆਜ਼ਾਦੀ………..?

ਵੱਡਿਆ ਦੇ ਭੁਲੇਖੇ ਦਾ ਸੰਤਾਪ
ਢਾਈ ਲੱਖ ਲੋਥਾਂ ਬਦਲੇ ਢਾਈ ਆਬ
ਆਗੂਆਂ ਦੀ ਕੁੱਕੜ ਖੇਹ, ਚੰਡੀਗੜ੍ਹ ਤੇ ਐਸ.ਵਾਈ.ਐਲ.
ਟਾਡਾ ਤੇ ਪੋਟਾ ਦੇ ਸਨਮਾਨ
ਧਰਮ ਅਸਥਾਨ ਤੇ ਲੱਖਾਂ ਜਵਾਨੀਆਂ ਦੀ ਅਹੂਤੀ
ਖੇਤਾਂ ਤੇ ਬਾਡਰਾਂ ‘ਤੇ ਮਰਦੇ ਬਲੀ ਦੇ ਬੱਕਰੇ
ਆਜ਼ਾਦੀ………..?

-ਚਰਨਜੀਤ ਸਿੰਘ ਤੇਜਾ

ਲਫ਼ਜਾਂ ਦਾ ਪੁਲ ਇਕ ਸੁਤੰਤਰ ਸਾਹਿਤਕ ਮੀਡੀਆ ਅਦਾਰਾ ਹੈ, ਜੋ ਬਿਨਾਂ ਕਿਸੇ ਸਿਆਸੀ ਜਾਂ ਵਪਾਰਕ ਦਬਾਅ ਅਤੇ ਪੱਖਪਾਤ ਦੇ ਤੁਹਾਡੇ ਤੱਕ ਸਾਹਿਤ, ਸਭਿਆਚਾਰ, ਵਿਰਸੇ ਨਾਲ ਸਬੰਧਤ ਲਿਖਤਾਂ, ਆਡਿਓ, ਵੀਡਿਓ, ਖ਼ਬਰਾਂ, ਸੂਚਨਾਵਾਂ ਅਤੇ ਜਾਣਕਾਰੀਆਂ ਪਹੁੰਚਾ ਰਿਹਾ ਹੈ। ਇਸ ਨੂੰ ਸਿਆਸੀ ਅਤੇ ਵਪਾਰਕ ਦਬਾਅ ਤੋਂ ਮੁਕਤ ਰੱਖਣ ਲਈ ਤੁਹਾਡੇ ਆਰਥਿਕ ਸਹਿਯੋਗ ਦੀ ਬੇਹੱਦ ਲੋੜ ਹੈ। ਤੁਸੀਂ ਆਪਣੀ ਮਰਜ਼ੀ ਅਨੁਸਾਰ ਜਿੰਨੀ ਚਾਹੋਂ ਸਹਿਯੋਗ ਰਾਸ਼ੀ ਸਾਨੂੰ ਹੇਠਾਂ ਦਿੱਤੇ ਬਟਨ ਉੱਤੇ ਕਲਿੱਕ ਕਰਕੇ ਭੇਜ ਸਕਦੇ ਹੋ। ਤੁਹਾਡੇ ਸਹਿਯੋਗ ਨਾਲ ਸਾਡੇ ਪੱਤਰਕਾਰ ਅਤੇ ਲੇਖਕ ਬੇਬਾਕੀ ਨਾਲ ਆਪਣਾ ਫ਼ਰਜ ਨਿਭਾ ਸਕਣਗੇ। ਧੰਨਵਾਦ।