ਰਿਸ਼ਤਾ: ਜਸਵੀਰ ਕੌਰ ਮੰਗੂਵਾਲ

ਮੇਰਾ ਤੇ ਉਹਦਾ ਰਿਸ਼ਤਾ
ਸੱਤ ਜਨਮਾਂ ਦਾ
ਸੱਤ ਫੇਰਿਆਂ ਦਾ
ਚਾਰ ਲਾਵਾਂ ਦਾ
ਕੁਰਾਨ ਦੀਆ ਆਇਤਾ ਤੋ ਬਾਅਦ
ਤਿੰਨ ਵਾਰੀ ਹਾਂ ਹਾਂ ਹਾਂ ਚ’ ਸਿਰ ਹਿਲਾਉਣ ਦਾ
ਕਾਜੀ ਭਾਈ ਪੁਜਾਰੀ ਦੀ ਮੌਜੂਦਗੀ ਚ’
ਵੇਦ ਕੁਰਾਨ ਤੇ ਗੁਰੁ ਗ੍ਰੰਥ ਦੇ
ਪਵਿੱਤਰ ਸ਼ਲੋਕਾ ਦੇ ਉਚਾਰਨ ਦਾ
ਦੋ ਪਵਿੱਤਰ ਆਤਮਾਵਾਂ ਦੇ
ਧੁਰੋ ਲਿਖੇ ਸੰਯੋਗਾ ਦਾ ਮੇਲ
ਅਕਸਰ ਜੋ ਸਿਮਟ ਜਾਦਾਂ ਹੈ
ਜਿਸਮ ਤੋਂ ਜਿਸਮ ਤੱਕ
ਤੇ ਨਹੀ ਕਰਦੀ ਰੂਹ ,ਰੂਹ ਤੱਕ ਸਫਰ
ਮੇਰੇ ਹਿੱਸੇ ਭੁਰਨਾ,ਖੁਰਨਾ ਟੁੱਟਣਾ
ਰੀਣ ਰੀਣ ਹੋ ਕੇ ਮਰਨਾ ਸੀਅ ਨਾ ਕਰਨਾ,
ਫਿਰ ਕਿਉ ਕੁਝ ਸ਼ਬਦ ਅਤੇ ਕਾਗਜ਼ ਕਰ ਦਿੰਦੇ ਨੇ
ਇਸ ਰਿਸ਼ਤੇ ਨੂੰ ਤਾਰ ਤਾਰ?
ਧਾਰਮਿਕ ਭਾਵਨਾਵਾ ਰਾਹੀ ਮੇਰੇ ਜ਼ਜ਼ਬਾਤਾ ਨਾਲ ਖਿਲਵਾੜ?
ਮਨੂੰ ਬਣ ਉਹ ਮੇਰੇ ਬੁੱਲਾਂ ਨੂੰ ਸਿਊਦਾਂ ਹੈ
ਅਖੌਤੀ ਸ਼ਰਮ ਹਯਾ ਦੀ ਸੂਈ ਨਾਲ
ਮੇਰੇ ਪੈਰਾਂ ਚ’ ਗੱਡਦਾ ਹੈ ਪ੍ਰਮੰਰਾਵਾਂ ਦੀਆਂ ਮੇਖਾਂ
ਮੇਰੇ ਰਾਹਾਂ ਚ’ ਵਿਛਾਉਦਾ ਹੈ ‘ਕਥਿਤ’ ਪਤੀਵਰਤਾ ਦੀਆਂ ਨੁਕੀਲੀਆਂ ਸੂਲਾਂ
ਮੈਨੂੰ ਨਹੀ ਚਾਹੀਦਾ ਸੱਤ ਜਨਮਾਂ ਦਾ ਸਾਥ
ਮੈ ਜਿਉਣਾ ਚਾਉਦੀ ਹਾਂ ਇੱਕੋ ਹੀ ਜਨਮ
ਜੀਅ ਭਰਕੇ,ਆਪਣੀ ਰੂਹ ਭਰ ਕੇ